चन्द्रमाको नयाँ यात्रा: नासाको आर्टेमिस–२ मानवसहित प्रक्षेपण सफल

काठमाडौँ । संयुक्त राज्य अमेरिकाको अन्तरिक्ष अनुसन्धान संस्था नासाले आर्टेमिस–२ नामक मानवसहितको चन्द्र अभियान सफलतापूर्वक प्रक्षेपण गरेको छ। यो उडान संयुक्त राज्य अमेरिकाको फ्लोरिडा राज्यस्थित केनेडी अन्तरिक्ष केन्द्रबाट साँझ ६ः३५ बजे गरिएको हो।

यो अभियान ५० वर्षभन्दा बढी समयपछि चन्द्रमाको परिक्रमा गर्ने पहिलो मानवसहितको यात्रा हो। यसअघि अपोलो अभियानपछि यस्तो उडान भएको थिएन।

अभियानमा चार अन्तरिक्ष यात्री सहभागी छन्। रिड वाइजम्यान, भिक्टर ग्लोभर र क्रिस्टिना कोच अमेरिकाका हुन् भने जेरेमी ह्यान्सेन क्यानडाका प्रतिनिधि हुन्।

यो उडान विशेष अन्तरिक्ष यान र शक्तिशाली रकेटमार्फत अन्तरिक्षमा पठाइएको हो। प्रक्षेपणअघि अन्तिम गणना केही समय रोकिए पनि पुनः सुरु गरी सफलतापूर्वक उडान सम्पन्न गरिएको थियो।

यस अभियानको मुख्य उद्देश्य गहिरो अन्तरिक्ष यात्राका लागि आवश्यक प्रविधि परीक्षण गर्नु हो। अन्तरिक्ष यानभित्रको जीवन–समर्थन प्रणालीको परीक्षण तथा आगामी चन्द्र अभियानहरूको तयारी यसबाट गरिनेछ।

यो यात्रामा अन्तरिक्ष यात्रीहरू चन्द्रमाको पछिल्लो भाग हुँदै पृथ्वीबाट करिब ७ हजार ४ सय किलोमिटर टाढासम्म पुग्नेछन्। यससँगै उनीहरू मानव इतिहासमै पृथ्वीबाट सबैभन्दा टाढा पुगेका अन्तरिक्ष यात्री बन्ने अपेक्षा गरिएको छ।