पश्चिमी वायुको प्रभाव: आजकाे माैसम कस्ताे ?

काठमाडौं । पश्चिमी तथा स्थानीय वायुको प्रभावसँगै देशको पूर्वी भूभागनजिक तल्लो वायुमण्डलमा विकसित न्यूनचापीय प्रणालीका कारण आज पनि देशका विभिन्न स्थानमा वर्षाको सम्भावना रहेको छ। जल तथा मौसम विज्ञान विभागका अनुसार मंगलबार देशभर मौसम आंशिकदेखि सामान्य बदली रहने र केही स्थानमा मेघगर्जन तथा चट्याङसहित वर्षा हुने पूर्वानुमान गरिएको छ।

विभागका अनुसार सोमबार केही स्थानमा भारी वर्षा भएको थियो भने आज भने मध्यमसम्मको वर्षाको सम्भावना देखिएको छ। विशेषगरी पहाडी र हिमाली भूभागमा बदली रहने र मौसम अस्थिर रहने अनुमान गरिएको छ।

दिउँसोको समयमा कोसी प्रदेश र गण्डकी प्रदेशका केही स्थानमा मेघगर्जन तथा चट्याङसहित मध्यम वर्षा हुने सम्भावना रहेको छ। साथै बाँकी प्रदेशका थोरै स्थानमा पनि हल्कादेखि मध्यम वर्षा हुन सक्ने जनाइएको छ। उच्च हिमाली क्षेत्रमा भने हल्का हिमपातको सम्भावना रहेको विभागले जनाएको छ।

तराई क्षेत्रमा भने आंशिक बदली रहने र केही ठाउँमा घाम देखिने सम्भावना रहेको छ। मौसमविद्हरूका अनुसार स्थानीय वायु सक्रिय रहँदा दिउँसोपछि वर्षा हुने सम्भावना बढी रहने गर्दछ।

रातिको समयमा मधेस प्रदेश, बागमती प्रदेश र गण्डकीसहित कोसी प्रदेशमा सामान्य बदली रहनेछ भने अन्य प्रदेशमा आंशिक बदली रहनेछ। कोसी, मधेस र बागमती प्रदेशका थोरै स्थानमा मेघगर्जन तथा चट्याङसहित मध्यम वर्षा हुने सम्भावना रहेको छ भने बाँकी प्रदेशका एक–दुई स्थानमा हल्का वर्षा हुन सक्ने अनुमान गरिएको छ।

मौसमविद्हरूले मेघगर्जन, चट्याङ, हावाहुरी तथा सम्भावित वर्षाका कारण सतर्कता अपनाउन आग्रह गरेका छन्। विशेषगरी पहाडी र हिमाली क्षेत्रमा यात्रा गर्ने तथा कृषिजन्य कार्यमा संलग्न व्यक्तिहरूलाई मौसमको अद्यावधिक जानकारी लिएर मात्र काम गर्न सुझाव दिइएको छ।