युक्रेन युद्ध अन्त्य गर्न मोदी र सीको प्रस्ताव, पुटिनले दिए सकारात्मक प्रतिक्रिया

काठमाडौं । भारतका प्रधानमन्त्री नरेन्द्र मोदी र चीनका राष्ट्रपति सी चिनफिङले रुस-युक्रेन युद्ध अन्त्य गर्न आफूहरू सहयोग गर्न तयार रहेको बताएका छन्।

रुसी राष्ट्रपति कार्यालय क्रेमलिनका अनुसार मोदी र सीले रुसी राष्ट्रपति भ्लादिमिर पुटिनसँग युद्ध अन्त्यका लागि सहयोग गर्ने प्रस्ताव गरेका हुन्। पुटिनले उक्त प्रस्तावप्रति सकारात्मक प्रतिक्रिया दिएको क्रेमलिनले जनाएको छ।

समाचार एजेन्सी रोयटर्सका अनुसार क्रेमलिनका प्रवक्ता दिमित्री पेस्कोभले भारतको नयाँ दिल्लीमा आयोजित ब्रिक्स शिखर सम्मेलनका क्रममा यस विषयमा छलफल भएको जानकारी दिएका छन्।

पेस्कोभले कुनै देशले आफ्नो प्रभाव प्रयोग गर्दै युक्रेनलाई थप लचकता अपनाउन प्रोत्साहित गरेमा रुसले त्यसलाई स्वागत गर्ने बताएका छन्।

रुसले शान्ति वार्ता पुनः सुरु गर्न आफू तयार रहेको बताउँदै आएको छ। तर, त्यसका लागि पूर्वी युक्रेनको डोनेत्स्क क्षेत्रको बाँकी भूभागमा पनि आफ्नो पूर्ण नियन्त्रण कायम हुनुपर्ने सर्त रुसले अघि सारेको छ। युक्रेनले भने रुसका यस्ता सर्तहरू अस्वीकार गर्दै आएको छ।

यसै महिनाको सुरुवातमा राष्ट्रपति पुटिनले पनि शान्ति सम्झौताको सम्भावना रहेको संकेत गरेका थिए। यद्यपि, उनले युद्धको स्थायी समाधान रुस र युक्रेनबीचको प्रत्यक्ष प्रयासबाटै खोजिनुपर्ने बताएका थिए।

मोदी र सीको पछिल्लो प्रस्तावले रुस–युक्रेन युद्ध अन्त्यका लागि कूटनीतिक प्रयासमा भारत र चीनको सम्भावित भूमिकाबारे चासो बढाएको छ।