बेनिनविरुद्धको खेलका लागि मेसी अर्जेन्टिनाको टोलीमा, अन्तिम अन्तर्राष्ट्रिय खेल हुने अपेक्षा

काठमाडौं । अर्जेन्टिनाले अक्टोबरमा बेनिनविरुद्ध हुने मैत्रीपूर्ण खेलका लागि स्टार फरवार्ड लियोनल मेसीलाई टोलीमा समावेश गरेको छ। उक्त खेल मेसीको अर्जेन्टिनाका लागि अन्तिम अन्तर्राष्ट्रिय खेल बन्ने अपेक्षा गरिएको छ।

मेसीले २०२६ को विश्वकप फाइनलमा स्पेनसँग अर्जेन्टिना पराजित भएपछि अगस्टमा राष्ट्रिय टोलीबाट सन्यासको घोषणा गरेका थिए। त्यसअघि बुबा जोर्जको निधनपछि उनले आफ्नो फुटबल भविष्यबारे सोचिरहेको बताएका थिए।

सन् २०२२ को विश्वकपमा अर्जेन्टिनालाई उपाधि दिलाउँदा कप्तानी गरेका ३९ वर्षीय मेसीले राष्ट्रिय टोलीबाट अलग हुने निर्णयले आफूलाई गहिरो रूपमा पीडा दिएको बताएका थिए। तर अर्जेन्टिनाका लागि आफूले सक्दो सबै दिएको र अब आफूले दिन बाँकी केही नरहेको बताएका थिए।

आठ पटकका बालोन डी’ओर विजेता मेसी हाल इन्टर मियामीबाट खेलिरहेका छन्। उनी अर्जेन्टिनाका सर्वाधिक गोलकर्ता र सर्वाधिक खेल खेल्ने खेलाडी हुन्। उनले राष्ट्रिय टोलीका लागि २०७ खेलमा १२५ गोल गरेका छन्।

अर्जेन्टिना फुटबल संघका अध्यक्ष क्लाउडियो तापियाले मेसीलाई राष्ट्रिय टोलीका लागि योग्य बिदाइ दिन अक्टोबर ६ मा अर्जेन्टिनामै खेल आयोजना गर्न लागिएको बताएका छन्।

बेनिनविरुद्धको खेल ब्युनस आयर्सस्थित रिभर प्लेटको ८५ हजार दर्शक क्षमताको एस्टाडियो मोनुमेन्टलमा हुनेछ। सन् २०२२ को विश्वकप जितेको अर्जेन्टिनाको टोलीका सदस्यहरूलाई पनि उक्त खेलमा निम्तो दिइएको छ।

विश्वकपका क्रममा फिफाको अनुशासनसंहिता उल्लंघन भएपछि अर्जेन्टिनालाई घरेलु मैदानमा हुने दुई खेल ५० प्रतिशत क्षमतामा खेलाउने सजाय सुनाइएको थियो। त्यसमध्ये एउटा खेलको सजाय स्थगित गरिएको थियो।

खेललाई गैरखेलकुद गतिविधिका प्रदर्शनका लागि प्रयोग गरेको, टोलीको अनुशासन उल्लंघन गरेको तथा समर्थकबाट भेदभावपूर्ण नारा र हाउभाउ गरिएको आरोपमा अर्जेन्टिनामाथि कारबाही भएको थियो।

इंग्ल्यान्डलाई २–१ ले हराउँदै विश्वकपको सेमिफाइनल जितेपछि अर्जेन्टिनाका केही खेलाडीले बेलायती अधीनमा रहेको फकल्यान्ड टापुमाथि अर्जेन्टिनाको सार्वभौमसत्ता दाबी गरिएको ब्यानरसमेत प्रदर्शन गरेका थिए।

अर्जेन्टिनाले सेप्टेम्बर ३० मा कोर्डोबामा बोलिभिया र अक्टोबर ३ मा ब्युनस आयर्समा बुर्किना फासोसँग मैत्रीपूर्ण खेल खेल्नेछ। त्यसैले बेनिनविरुद्धको खेलअघि नै प्रतिबन्धसम्बन्धी सजाय पूरा हुने अपेक्षा गरिएको छ।

विश्वकप फाइनलपछि मैदानभित्र भएको झडपमा संलग्न भएको भन्दै अर्जेन्टिनाका मिडफिल्डर लिएन्ड्रो पाराडेसलाई १० खेल र नाहुएल मोलिनालाई ७ खेलको प्रतिबन्ध लगाइएको छ। त्यसका कारण उनीहरू बेनिनविरुद्धको खेलमा उपलब्ध नहुने अपेक्षा गरिएको छ।