भारतमा चक्रवात ‘अर्णव’को जमिनमा प्रवेश, १५० किलोमिटर प्रतिघण्टासम्म हावाको गति

काठमाडौं । बंगालको खाडीमा विकसित शक्तिशाली चक्रवात "अर्णव" मंगलबार रातिदेखि भारतको आन्ध्र प्रदेश र यानम तटीय क्षेत्रमा जमिनमा प्रवेश गर्न थालेको छ । भारतीय मौसम विज्ञान विभाग (आईएमडी) का अनुसार चक्रवातका कारण उक्त क्षेत्रमा भीषण वर्षा र तीव्र हावाहुरी चलिरहेको छ ।

मौसम विभागले जारी गरेको चेतावनीअनुसार चक्रवातको केन्द्रनजिक हावाको गति प्रतिघण्टा १२५ देखि १३५ किलोमिटर रहेको छ । हावाको गति बढेर प्रतिघण्टा १५० किलोमिटरसम्म पुग्न सक्ने विभागले जनाएको छ ।

पछिल्लो तीन घण्टामा प्रतिघण्टा तीन किलोमिटरको गतिमा उत्तरपश्चिमतर्फ अघि बढेको चक्रवात सुरुमा उत्तरपश्चिम र त्यसपछि उत्तर–उत्तरपश्चिम दिशातर्फ अघि बढ्ने अनुमान गरिएको छ ।

आईएमडीले आफ्नो बुलेटिनमा चक्रवातको जमिनमा प्रवेश गर्ने प्रक्रिया थप तीन घण्टासम्म जारी रहने जनाएको छ । बापटला र विशाखापट्टनमको बीचमा पर्ने यानमको दक्षिणतर्फ चक्रवातले तटीय क्षेत्रलाई प्रभावित पारेको हो । जमिनमा प्रवेश गरेपछि हावाको गति क्रमशः घट्दै जाने अनुमान गरिएको छ ।

चक्रवातका कारण समुद्रमा १.५ देखि २.५ मिटरसम्म अग्ला लहर उठ्न सक्ने चेतावनी मौसम विभागले दिएको छ । त्यस्ता लहरले आन्ध्र प्रदेशका तल्लो तटीय क्षेत्रमा बाढी तथा डुबान निम्त्याउन सक्ने अनुमान गरिएको छ । विशेषगरी काकिनाडा र पुडुचेरीको यानम आसपासका क्षेत्रमा समुद्री लहरको प्रभाव बढी पर्न सक्ने जनाइएको छ ।

अक्टोबर २८ को बिहानसम्म अनकापल्ली र विशाखापट्टनम जिल्लाका धेरै स्थानमा २०० मिलिमिटरभन्दा बढी वर्षा भइसकेको विवरण सार्वजनिक भएको छ । भीषण वर्षा र तीव्र हावाहुरीका कारण तटीय क्षेत्रको जनजीवन प्रभावित बनेको छ ।

चक्रवातका कारण आन्ध्र प्रदेशको काकिनाडामा धेरै रुख ढलेका छन् भने बिजुलीका पोलसमेत भाँचिएका छन् । विशाखापट्टनमको बिच रोड र सीताम्माधारामा रुख ढलेर सडक अवरुद्ध भएका छन् । तीव्र हावाहुरी र वर्षाले यातायात तथा दैनिक गतिविधिमा समेत असर पारेको छ ।

चक्रवात अर्णवको प्रभाव भारतको पश्चिम बंगालका विभिन्न भागमा पनि देखिएको छ । त्यहाँ भारी वर्षा र तीव्र हावाहुरीका कारण जनजीवन प्रभावित भएको विवरणमा उल्लेख छ ।

चक्रवातको गति, भारी वर्षा र समुद्री लहरको सम्भावित जोखिमलाई ध्यानमा राख्दै प्रभावित तटीय क्षेत्रमा सतर्कता अपनाउन आवश्यक देखिएको छ ।