न्युयोर्कमा अत्यधिक चिसोका कारण १४ जनाको मृत्यु

न्युयोर्क । गएको हप्तादेखि न्युयोर्क सहरमा अत्यधिक चिसोका कारण १४ जनाको मृत्यु भएको न्युयोर्कका मेयर जोहरान ममदानीले पुष्टि गरेका छन्।

स्थानीय सञ्चारमाध्यमका अनुसार प्रारम्भिक अनुसन्धानले चिसोका कारण कम्तीमा आठ जनाको मृत्यु भएको पुष्टि गरेको छ। अमेरिकामा जनवरी २५ मा आएको भीषण जाडो आँधीका कारण ठूलो मात्रामा हिमपात हुँदा सडक र फुटपाथ अवरुद्ध भएका थिए।

मेयर ममदानीका अनुसार हालसम्म करिब ६ करोड ७० लाख पाउन्ड हिउँ पग्लिसकेको छ भने हिउँ हटाउन १८ करोड ८० लाख पाउन्ड नुन प्रयोग गरिएको छ। घरबारविहीन तथा विस्थापितलाई चिसोबाट जोगाउन नयाँ आश्रय केन्द्रहरू खोलिएको र न्युयोर्क सहरका पाँच स्थानमा तातो र सुरक्षित आश्रय उपलब्ध गराइएको जनाइएको छ।