नेप्सेमा सामान्य सुधार, हाईड्रो समूहमा लगानीकर्ताको चासो बढ्दै

काठमाडाैँ १ बैशाख । नेप्सेमा आज सामान्य सुधार देखिएको छ। परिसूचक ७.०१ अंकले बढेर २६९६.२३ विन्दुमा पुगेको छ। कारोबार रकम पनि उल्लेखनीय रह्यो । ७ अर्ब २६ करोड रुपैयाँभन्दा बढीको सेयर किनबेच भयो।हाईड्रो समूहमा लगानीकर्ताको आकर्षण झनै बढेको देखिन्छ, जसले १.७२ प्रतिशतले वृद्धि गर्दै बजारलाई बलियो समर्थन दियो। विशेष गरी ङादी ग्रुप पावर, बलेफी हाईड्रो, राधी विद्युत, एनआरएन इन्फ्रास्ट्रक्चर, र हिमालयन पावर पार्टनर जस्ता कम्पनीहरूमा उल्लेखनीय कारोबार देखियो।

आज पाँच कम्पनीको सेयरमूल्यमा अपर सर्किट लागेको छ। जसमा कर्पोरेट डेभलपमेन्ट बैंक, बलेफी हाईड्रो, राधी विद्युतजस्ता कम्पनी छन्। बजार विश्लेषकहरूका अनुसार, गभर्नर नियुक्तिमा ढिलाइ भए पनि औसतभन्दा माथिको कारोबारले बजारमा भरोसा देखिएको छ।

आगामी बजेट र नयाँ नेतृत्वको पर्खाइबीच बजार प्रवृत्ति सकारात्मक देखिन्छ। यता, बैंकिङ, विकास बैंक, बीमा, व्यापारजस्ता समूहमार्फत पनि बजारमा हरियाली फैलिएको छ। तर, अन्य, फाइनान्स, होटल, उत्पादन र लगानी समूह भने केही कमजोर देखिए।

लगानीकर्ताहरूलाई अहिले सावधानीका साथ अवसरको खोजी गर्न सल्लाह दिइएको छ, किनकि बजारले अहिले प्रवृत्ति परिवर्तनको सङ्केत दिइरहेको छ।