इंग्ल्यान्डको पसिना छुट्यो, तर नेपाललाई अन्तिम ओभरमा निराशा

मुम्बई। दुईपटक टी-२० विश्वकप विजेता इंग्ल्यान्डविरुद्ध नेपाल ऐतिहासिक जितको अत्यन्तै नजिक पुगे पनि अन्तिम ओभरमा एक छक्काको अभावले रोमाञ्चक खेल गुमाउन बाध्य भएको छ। जित हातबाट फुत्किए पनि यस म्याचमा देखिएको नेपाली टोलीको प्रदर्शनले विश्व क्रिकेटमा नेपाललाई गम्भीर प्रतिस्पर्धीको रूपमा स्थापित गरेको छ।

दुई वर्षअघि दक्षिण अफ्रिकाविरुद्ध अन्तिम क्षणमा चुक्दा झैँ, यसपटक पनि नेपालले बलियो टोलीलाई दबाबमा राख्दै जितको संघारसम्म पुर्‍यायो। अन्तिम ७ बलमा १० रन आवश्यक रहँदा पाँच विकेट हातमै थिए र क्रिजमा विस्फोटक ब्याट्सम्यान लोकेश बम तथा गुल्शन झा रहेका कारण नेपाली समर्थकको आशा बलियो देखिन्थ्यो। तर १९ औँ ओभरको अन्तिम बलमा गुल्शन आउट भएपछि खेलको मोड फेरियो। अन्तिम ओभरमा साम करनविरुद्ध लोकेश बमले अपेक्षित प्रहार गर्न नसक्दा नेपाल जितबाट एक कदम टाढा रह्यो।

यसअघि इंग्ल्यान्डको इनिङमा नेपालले उत्कृष्ट बलिङ प्रदर्शन गरेको थियो। विशेषगरी सन्दीप लामिछानेले डेथ ओभरमा देखाएको नियन्त्रण र धारिलो स्पिनले इंग्ल्यान्डका ब्याट्सम्यानलाई रन बनाउन हम्मे–हम्मे पार्‍यो। उनले ह्यारी ब्रुक र विल ज्याक्स जस्ता आक्रामक ब्याटरलाई समेत दबाबमा राख्दै आफ्नो स्तर प्रमाणित गरे। यद्यपि अन्तिम ओभरमा करण केसीले २१ रन खर्चिँदा इंग्ल्यान्डले अपेक्षाभन्दा ठूलो लक्ष्य खडा गर्न सफल भयो, जुन अन्ततः निर्णायक बन्यो।

बलर प्रयोगमा कप्तानी निर्णयहरू पनि बहसको विषय बने। कुशल भुर्तेलको बलिङ प्रभावकारी नदेखिँदा पनि पूरा चार ओभर प्रयोग गरिनु र दुई–दुई विकेट लिएका दीपेन्द्र सिंह ऐरी तथा नन्दन यादवलाई पूरा कोटा नदिनुले इंग्ल्यान्डको स्कोर नियन्त्रणमा केही चुक भएको देखियो।

ब्याटिङतर्फ भने नेपालले आत्मविश्वासपूर्ण खेल देखायो। जोफ्रा आर्चर र आदिल रसिदजस्ता विश्वस्तरीय बलरलाई नेपाली ब्याटरले खुलेर आक्रमण गरे। आर्चरले चार ओभरमा ४२ रन खर्चिए भने रसिदले तीन ओभरमै ४२ रन खाएपछि चौथो ओभर नै पाएनन्। कुशल भुर्तेलले आर्चरविरुद्ध आक्रामक सुरुआत गर्दै नेपाललाई मोमेन्टम दिलाए भने कप्तान रोहित पौडेल र उपकप्तान दीपेन्द्र सिंह ऐरीले ८२ रनको महत्वपूर्ण साझेदारी गर्दै इनिङ सम्हाले।

मध्यक्रममा लोकेश बमले पाएको अवसरको सदुपयोग गर्दै आर्चरविरुद्ध लगातार दुई छक्का प्रहार गरेपछि नेपाल जिततर्फ लम्किएको देखिन्थ्यो। १९ औँ ओभरमा दुई चौकासहित उनले खेललाई अन्तिम ओभरसम्म पुर्‍याए। अन्तिम बलमा छक्का हानेर ‘हिरो’ बन्ने अवसर उनीसँग थियो, तर त्यो सम्भव भएन।

नतिजा नेपालका पक्षमा नआए पनि यो खेल नेपाली क्रिकेटका लागि गर्व गर्नलायक रह्यो। समूहकै सबैभन्दा बलियो मानिएको इंग्ल्यान्डविरुद्ध देखाएको प्रतिस्पर्धी प्रदर्शनले नेपाललाई वेस्ट इन्डिज, स्कटल्यान्ड र इटलीविरुद्धका आगामी खेलका लागि थप आत्मविश्वास दिएको छ। हारको पीडा भए पनि यस म्याचले नेपाली टोलीको क्षमतामाथि विश्व क्रिकेटको ध्यान तानेको छ, जुन आगामी दिनमा नेपालका लागि ठूलो उपलब्धि बन्न सक्छ।