जिम्बाब्वेसँग अस्ट्रेलिया स्तब्ध : टी–२० विश्वकपमा २३ रनको जीत

मुम्बई । आईसीसी टी-२० विश्वकपअन्तर्गत भएको प्रतिस्पर्धात्मक खेलमा जिम्बाब्वेले दाबेदार अस्ट्रेलियालाई २३ रनले पराजित गर्दै ठूलो उलटफेर गरेको छ । कागजमा बलियो देखिएको अस्ट्रेलिया निर्णायक क्षणमा चुकेपछि जिम्बाब्वेले ऐतिहासिक जित दर्ता गर्न सफल भयो ।

टस जितेर ब्याटिङ रोजेको जिम्बाब्वेले निर्धारित २० ओभरमा २ विकेट गुमाउँदै १६९ रन बनायो । ओपनर ब्राइन बेन्नेटले उत्कृष्ट ६४ रनको इनिङ्स खेल्दै टोलीलाई बलियो सुरुवात दिलाए । मध्यक्रममा सिकन्दर राजा ले २५ रन जोड्दै स्कोर स्थिर राखे ।
जिम्बाब्वेका ब्याटरहरूले सुरुआती ओभरमा संयमित खेल देखाए भने डेथ ओभरमा आक्रामक ब्याटिङ गर्दै अस्ट्रेलियामाथि दबाब बढाए। अन्तिम पाँच ओभरमा तीव्र गतिमा रन बटुलेपछि स्कोर १६९ सम्म पुग्यो, जुन टी–२० विश्वकपको सन्दर्भमा प्रतिस्पर्धात्मक लक्ष्य मानिन्छ।

१७० रनको लक्ष्य पछ्याएको अस्ट्रेलिया सुरुआतमै दबाबमा पर्‍यो। नियमित अन्तरालमा विकेट गुमाउँदा रनगति नियन्त्रणमा आउन सकेन। म्याट रेनश ले ६५ रनको संघर्षपूर्ण इनिङ्स खेले भने ग्लेन म्याक्सवेल ले ३१ रन बनाए। तर अन्य ब्याटर चल्न नसक्दा टोली १४६ रनमै समेटियो।

मध्य ओभरमा स्पिन र तीव्र गतिका बलरहरूले अस्ट्रेलियालाई रन बनाउन कठिन बनाएका थिए। आवश्यक रनरेट बढ्दै जाँदा दबाब झन् चर्कियो र अन्ततः अस्ट्रेलिया लक्ष्यभन्दा २३ रनले पछि पर्‍यो।

जिम्बाब्वेका तीव्र गतिका बलर ब्लेसिङ मुजाराबानी ले ४ विकेट लिएर अस्ट्रेलियाको ब्याटिङ लाइनअप ध्वस्त पारे। उनलाई राम्रो साथ दिँदै ब्राड इभान्स ले ३ विकेट लिए। उनीहरूको सटिक लाइन–लम्बाइ र डेथ ओभरको नियन्त्रण नै जितको मुख्य आधार बन्यो।

यस जितसँगै जिम्बाब्वेले समूह चरणको समीकरणमा ठूलो प्रभाव पारेको छ। दाबेदार अस्ट्रेलियाविरुद्धको जीतले जिम्बाब्वेको आत्मविश्वास उच्च बनाएको छ भने अस्ट्रेलियाका लागि अघिल्ला खेल झन् निर्णायक बन्ने भएका छन्।

टी–२० विश्वकपमा अप्रत्याशित नतिजाहरू दोहोरिने क्रम जारी रहँदा जिम्बाब्वेको यो जित प्रतियोगिताकै महत्वपूर्ण क्षणमध्ये एकका रूपमा दर्ज भएको छ।