नेपाल समूह चरणबाट बाहिरियो, वेस्ट इन्डिज सुपर एटमा

मुम्बई । समूह 'सी' अन्तर्गत आफ्नो तेस्रो खेलमा नेपाल दुई पटकको च्याम्पियन वेस्ट इन्डिजसँग ९ विकेटले पराजित हुँदै प्रतियोगिताबाट बाहिरिएको छ। लगातार तीन हारपछि नेपाल अंकविहीन रहँदै समूह चरणबाट बाहिरिने दोस्रो टोली बन्यो भने लगातार तीन जितसहित वेस्ट इन्डिज सुपर एटमा पुग्ने पहिलो टिम बन्यो ।

नेपालले दिएको १३४ रनको लक्ष्य वेस्ट इन्डिजले १५.२ ओभरमै १ विकेट गुमाएर सजिलै पूरा गर्‍यो। कप्तान शाई होप (६१* रन, ४४ बल) र शिमरोन हेतमायर (४६* रन) बीच दोस्रो विकेटका लागि अविजित ९१ रनको साझेदारी निर्णायक बन्यो। ब्रान्डन किङले २२ रन जोड्दै सुरुवात बलियो बनाइदिए।

नेपालका लागि एक्लो सफलता नन्दन यादवको नाममा रह्यो ।

टस हारेर पहिले ब्याटिङ गरेको नेपालले ८ विकेट गुमाउँदै १३३ रन बनायो। पावर–प्लेमा ६ ओभरभित्रै ३ विकेट गुमाएर २२ रन मात्र जोड्नु नै खेलको टर्निङ प्वाइन्ट सावित भयो—टी–२० विश्वकप इतिहासमा नेपालको सबैभन्दा कमजोर पावर–प्ले प्रदर्शन।

शीर्षक्रम फेरि असफल भयो । कुशल भुर्तेल पहिलो ओभरमै आउट, त्यसपछि रोहित पौडेल, आसिफ शेख र आरिफ शेख सस्तोमा फर्किँदा नेपाल ४६/५ को संकटमा पुग्यो।

यही अवस्थामा उपकप्तान दीपेन्द्र सिंह ऐरीले जिम्मेवारी सम्हाले। उनले ४७ बलमा ५८ रन बनाउँदै नेपालको इनिङ्स जोगाउने प्रयास गरे। गुल्सन झासँग २७ रन र सोमपाल कामीसँग ५४ रनको साझेदारीले स्कोरलाई प्रतिस्पर्धात्मक बनायो। 

दीपेन्द्र टी–२० विश्वकपमा नेपालका लागि अर्धशतक बनाउने दोस्रो खेलाडी बने । यसअघि सन् २०१४ मा आइसीसी वर्ल्ड कप टि-२० मा सुबास खकुरेलले अफगानिस्तानविरुद्ध अर्धशतक प्रहार गरेका थिए ।

१३४ रन जोगाउन नेपाललाई सुरुवाती ब्रेकथ्रु आवश्यक थियो । तर होप–किङ जोडीले ४३ रनको ओपनिङ साझेदारी गर्दै दबाब हटाइदिए। त्यसपछि होप र हेतमायरले आक्रामक–नियन्त्रित ब्याटिङ संयोजन गर्दै रनरेटलाई नियन्त्रणमा राखे ।

नेपालका स्पिनरहरू अपेक्षाकृत प्रभावहीन देखिए भने डेथ ओभरमा पनि आक्रामक विकल्पको अभाव खट्कियो। वेस्ट इन्डिजका जेसन होल्डरले ४ विकेट लिएर नेपालको मध्यमक्रम तोडिदिए, जसले १५–२० रन कम हुन पुगेको विश्लेषकहरू बताउँछन्।

समूह ‘सी’ को समीकरण

वेस्ट इन्डिज – ३ खेल, ३ जित, ६ अंक (सुपर एट)

इंग्ल्यान्ड – ३ खेल, २ जित, ४ अंक

स्कटल्याण्ड – ३ खेल, १ जित, २ अंक

इटली – ३ खेल, १ जित, २ अंक

नेपाल – ३ खेल, ० जित, ० अंक

अब इंग्ल्यान्डले इटलीलाई हराए सुपर एटमा पुग्नेछ। इटलीका लागि बाँकी दुवै खेल जित्नैपर्ने दबाब छ। नेपालका लागि स्कटल्याण्डविरुद्धको अन्तिम खेल प्रतिष्ठाको लडाइँ मात्र हुनेछ।

यसै खेलबाट सोमपाल कामी नेपालका लागि तीन टी–२० विश्वकप खेल्ने एक मात्र खेलाडी बने। २०१४ देखि २०२६ सम्म निरन्तर टोलीमा रहेर उनले निरन्तरता र अनुभवको उदाहरण प्रस्तुत गरेका छन्। उनी टी–२० विश्वकपमा नेपालका लागि सर्वाधिक ७ खेल खेल्ने खेलाडी पनि बनेका छन्।