अब कांग्रेसले कुनै पनिदलीय भाग लिँदैन : गगन थापा

काठमाडौँ ७ फागुन । नेपाली कांग्रेसका सभापति गगनकुमार थापा ले अबको कांग्रेसले सरकारी वा संवैधानिक नियुक्तिमा कुनै पनि दलीय प्रभाव वा भाग नलिने प्रतिज्ञा गरेका छन्। उनले आगामी दिनमा दल होइन, योग्यतामाथि केन्द्रित भएर नियुक्ति प्रक्रियामा अघि बढिने स्पष्ट पारेका छन्।

चुनावी प्रतिज्ञा पत्र सार्वजनिक कार्यक्रममा गरिएको प्रश्नोत्तरमा सभापति थापाले स्पष्ट रूपमा भने, “अबको कांग्रेसले कुनै नियुक्तिमा दलको प्रभाव चलाउने छैन। संवैधानिक आयोग, विश्वविद्यालय वा अन्य निकायमा भाग लिन गयो भन्ने कुरा सुन्नुपर्ने छैन। अब्बल व्यक्तित्व र क्षमता प्रमुख आधार हुनेछ।” उनले संस्थागत सुधारका बिना नियुक्ति प्रक्रियामा सुधार सम्भव नहुने पनि जोड दिए।

थापाले विगतका अनुभवका आधारमा सरकारमा रहेका व्यक्तिहरूको सम्पत्ति छानबिन गर्ने उद्देश्यले आयोग गठन गर्ने योजना रहेको जानकारी दिएका छन्। उनका अनुसार यस कदमले पारदर्शिता र जवाफदेहिता सुनिश्चित गर्दै नियुक्तिमा अनुचित दलीय हस्तक्षेपलाई रोक्नेछ।

सभापति थापाले आगामी दिनमा कांग्रेसले केवल राजनीतिक लाभ वा लोकप्रियताका आधारमा होइन, राष्ट्रिय हित र योग्यतामाथि ध्यान केन्द्रित गर्ने स्पष्ट संकेत दिए। उनले नागरिकले संस्थागत सुधार र निष्पक्षता प्रतिको विश्वास कायम राख्नुपर्ने भन्दै पार्टीभित्र र बाहिर दुवै क्षेत्रमा पारदर्शिता बढाउन आवश्यक रहेको बताए।

यो घोषणाले आगामी निर्वाचन र प्रशासनिक नियुक्ति प्रक्रियामा कांग्रेसको दृष्टिकोणलाई स्पष्ट पारेको छ। दल र व्यक्तिगत स्वार्थभन्दा माथि उठेर योग्य र सक्षम व्यक्तिलाई नियुक्त गर्ने राजनीतिक संस्कारको स्थापना गर्ने प्रयासमा कांग्रेस लागेको उनले बताए। यसैबीच, पार्टीका कार्यकर्ताहरू र समर्थकहरूलाई पनि निष्पक्षता, जवाफदेहिता र पारदर्शितामाथि ध्यान दिन आग्रह गरेका छन्।

थापाको यो कदमले नेपाली राजनीतिको परिप्रेक्ष्यमा नियुक्ति प्रक्रियामा दलीय हस्तक्षेप घटाउने सम्भावना रहेको विश्लेषकहरूले बताएका छन्। कांग्रेसले अब्बल र योग्यतालाई प्राथमिकता दिने नीति सार्वजनिक गरेसँगै आगामी नियुक्ति र प्रशासनिक निर्णयमा पारदर्शिता बढ्ने अपेक्षा गरिएको छ।