प्रधानमन्त्री कप क्रिकेट चैत ७ देखि सुरु हुने

नेपाल क्रिकेट सङ्घ (क्यान)ले प्रधानमन्त्री कप राष्ट्रिय एकदिवसीय क्रिकेट प्रतियोगिता चैत ७ गतेदेखि सुरु हुने जानकारी दिएको छ। प्रतियोगिता काठमाडौँस्थित त्रिवि क्रिकेट मैदान र मूलपानी क्रिकेट मैदानमा आयोजना गरिनेछ।

यसका साथै केही खेल धनुषाको जनकपुर र पर्सा जिल्लामा पनि खेलाइने तयारी गरिएको छ। प्रतियोगिता वैशाख ४ गतेसम्म सञ्चालन हुने तालिका सार्वजनिक गरिएको छ।

यसैबीच जय ट्रफी क्रिकेट प्रतियोगिताको फाइनल खेल चैत ३ देखि ५ गतेसम्म माथिल्लो मूलपानी मैदानमा आयोजना हुने भएको छ। प्रतिनिधिसभा निर्वाचन र आईसीसी विश्वकप क्रिकेट लिग–२ का खेलका कारण जय ट्रफीको तालिका परिवर्तन गरिएको हो। घरेलु क्रिकेटलाई प्रतिस्पर्धात्मक बनाउन यस्तो प्रतियोगिताले महत्वपूर्ण योगदान दिने अपेक्षा गरिएको छ।