कराँचीमा वर्षा र आँधीका कारण १७ जनाको मृत्यु, ३० घाइते

कराँची । पाकिस्तानको दक्षिणी बन्दरगाह सहर कराँची मा वर्षासँगै आएको आँधीबेहरीका कारण कम्तीमा १७ जनाको मृत्यु भएको छ भने ३० जना घाइते भएका छन्।

स्थानीय अधिकारी र उद्धार टोलीका अनुसार भारी वर्षापछि सहरका विभिन्न स्थानमा दुर्घटना हुँदा मानवीय क्षति भएको हो। घटनाले सहरको कमजोर पूर्वाधार र जोखिम व्यवस्थापनको अवस्था समेत उजागर गरेको छ।

उद्धारकर्मीहरूले दिएको जानकारीअनुसार बलदिया टाउन क्षेत्रमा पर्खाल भत्किँदा मात्रै ११ जनाले ज्यान गुमाएका छन्। त्यस्तै, अन्य स्थानहरूमा थप ६ जनाको मृत्यु भएको छ। कायद आबाद क्षेत्रमा घरको छाना भत्किँदा एक दम्पतीको ज्यान गएको जनाइएको छ।

कराँचीका मेयर मुर्तजा वहाब ले सहरमा तीव्र हावाहुरीसहित भारी वर्षा जारी रहेको भन्दै सर्वसाधारणलाई अत्यावश्यक बाहेक घरबाहिर ननिस्कन आग्रह गरेका छन्।

यसैबीच, सिन्ध प्रान्त का स्थानीय सरकार मन्त्री नासिर हुसेन शाह ले कराँचीसहित प्रान्तभर उच्च सतर्कता घोषणा गरिएको जानकारी दिएका छन्।