भिनिसियसको डबलले एट्लेटिको पराजित, रियल मड्रिड शीर्ष दौडमा बलियो

काठमाडौँ । भिनिसियस जुनियरको दुई गोलको मद्दतमा रियल मड्रिडले शहर प्रतिद्वन्द्वी एट्लेटिको मड्रिडलाई ३–२ ले हराउँदै ला लिगाको उपाधि दौड झनै रोमाञ्चक बनाएको छ। यस जितसँगै रियलले बार्सिलोनासँगको अंक दूरी चारमा झारेको छ।

पहिलो हाफमा १–० ले पछि परेको रियलले दोस्रो हाफमा उत्कृष्ट पुनरागमन गर्दै खेल आफ्नो पक्षमा पारेको हो। खेलको सुरुवातमा अदेमोला लुकम्यानले जुलियानो सिमेओनेको ब्याकहिल पासलाई सदुपयोग गर्दै एट्लेटिकोलाई अग्रता दिलाएका थिए।

तर दोस्रो हाफमा रियल फर्कियो । ब्राहिम डियाजमाथि भएको फाउलबाट पाएको पेनाल्टीलाई भिनिसियसले गोलमा परिणत गर्दै खेल बराबरीमा ल्याए। त्यसपछि डिफेन्सको कमजोरीको फाइदा उठाउँदै फेडेरिको भाल्भेर्डेले गोल गरेपछि रियल २–१ ले अघि बढ्यो ।

एट्लेटिकोले हार नमानी नाहुएल मोलिनाको शक्तिशाली लामो दूरीको प्रहारमार्फत खेल २–२ को बराबरीमा ल्यायो। तर त्यसको केही समयमै ट्रेन्ट अलेक्जेन्डर–आर्नोल्डको पासमा भिनिसियसले शानदार कर्लिङ प्रहार गर्दै निर्णायक गोल गरे। यो गोलसँगै भिनिसियसले पछिल्ला ११ खेलमा १०औँ गोल पूरा गरेका छन्।

खेलको अन्त्यतिर भाल्भेर्डेले एलेक्स बेएनामाथि गरेको फाउलका कारण सोझै रातो कार्ड पाएपछि रियल दबाबमा परेको थियो। त्यसपछि एट्लेटिकोले बराबरीका लागि आक्रामक प्रयास गरे पनि जुलियन अल्भारेजको प्रहार पोस्टमा लागेर फर्किएपछि रियलले राहत पाएको थियो।

चोटका कारण लामो समय मैदान बाहिर रहेका जुड बेलिङ्घम पनि यस खेलमार्फत पुनरागमन गरेका छन् भने किलियन एम्बाप्पे बेन्चमा उपलब्ध थिए।

अन्ततः रियलले खेल जोगाउँदै सेप्टेम्बर २०२२ पछि पहिलो पटक ला लिगामा एट्लेटिकोविरुद्ध जित दर्ता गर्‍यो। यसअघि बार्सिलोनाले रायो भालेकानोमाथि जित निकाल्दै अग्रता बढाएको भए पनि रियलको जितले शीर्ष स्थानको प्रतिस्पर्धा अझै कडा बनाएको छ।