ओली र लेखकको बन्दीप्रत्यक्षीकरण रिटमा भोलि सुनुवाइ

काठमाडौं । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको पक्राउविरुद्ध दायर बन्दीप्रत्यक्षीकरण रिटमाथि सर्वोच्च अदालतले सोमबार सुनुवाइ गर्ने भएको छ।

ओलीकी पत्नी राधिका शाक्यले आइतबार सर्वोच्च अदालतमा बन्दीप्रत्यक्षीकरण रिट दायर गरेकी थिइन्। उक्त रिट दर्ता भइसकेको र सोमबारका लागि पेशी तोकिएको अदालतका प्रवक्ता अर्जुनप्रसाद कोइरालाले जानकारी दिएका छन्।

यसैगरी, लेखककी पत्नी यशोदा लेखकले पनि आफ्ना पतिलाई हिरासतबाट मुक्त गर्न माग गर्दै आइतबार नै रिट दायर गरेकी हुन्। उनको रिट पनि दर्ता भई सुनुवाइका लागि सोमबारकै मिति तय गरिएको छ।

जेनजी आन्दोलनसम्बन्धी जाँचबुझ आयोगले दिएको प्रतिवेदनका आधारमा सरकारको निर्देशनमा शनिबार ओली र लेखकलाई पक्राउ गरिएको थियो। पक्राउपछि उनीहरूलाई हिरासतमा राखिएको छ भने त्यसको वैधानिकतामाथि सर्वोच्च अदालतमा प्रश्न उठाइएको हो।

अब सर्वोच्च अदालतको सोमबारको सुनुवाइले उनीहरूको हिरासतको वैधानिकता, प्रक्रिया र अधिकारसम्बन्धी पक्षबारे प्रारम्भिक निर्णय दिने अपेक्षा गरिएको छ।